ملک میں سیاسی کشیدگی مزید نہیں بڑھنی چاہیے، بیرسٹر گوہر

شائع شدہ تاریخ 07 نومبر, 2026
ملک-میں-سیاسی-کشیدگی-مزید-نہیں-بڑھنی-چاہیے،-بیرسٹر-گوہر

9 نیوز ایچ ڈی: پاکستان تحریک انصاف کے چیئرمین بیرسٹر گوہر علی خان نے ملک میں بڑھتی ہوئی سیاسی کشیدگی پر تشویش کا اظہار کرتے ہوئے کہا ہے کہ سیاسی تناؤ مزید نہیں بڑھنا چاہیے اور اب یہ سلسلہ ختم ہونا چاہیے۔

 ان کا کہنا ہے کہ ملک، قوم اور جمہوریت کے مفاد میں تمام سیاسی قوتوں کو حالات بہتر بنانے کے لیے اپنا کردار ادا کرنا ہوگا۔

پشاور ہائی کورٹ میں میڈیا سے گفتگو کرتے ہوئے بیرسٹر گوہر نے کہا کہ سیاسی مسائل کا حل بات چیت کے ذریعے نکالا جانا چاہیے۔ انہوں نے زور دیا کہ سیاسی رہنماؤں کو ایک دوسرے کے خلاف سخت بیانات دینے کے بجائے مذاکرات کا راستہ اختیار کرنا چاہیے۔

انہوں نے مولانا فضل الرحمان کی حالیہ تقریر کا ذکر کرتے ہوئے کہا کہ ان کی جماعت اور ان کی اپنی سیاست ہے، تاہم تقریر میں بعض الفاظ استعمال نہ کیے جاتے تو بہتر ہوتا۔ بیرسٹر گوہر کے مطابق حکومتی نمائندوں کی جانب سے بھی جس انداز میں جواب دیا گیا، وہ مناسب نہیں تھا۔

پی ٹی آئی چیئرمین نے بانی پی ٹی آئی عمران خان سے ملاقاتوں کے معاملے پر بھی بات کی۔ ان کا کہنا تھا کہ اگر ملاقاتوں کا سلسلہ جاری رہتا تو سیاسی حالات میں اتنا تناؤ پیدا نہ ہوتا۔ انہوں نے سیاسی رہنماؤں کے درمیان رابطے اور مذاکرات کی ضرورت پر بھی زور دیا۔

بیرسٹر گوہر نے کہا کہ سیاسی اختلافات اپنی جگہ، لیکن ملک اور جمہوریت کا مفاد سب سے اہم ہونا چاہیے۔ ان کے اس بیان کے بعد سیاسی حلقوں میں یہ سوال اہم ہے کہ حکومت اور اپوزیشن کے درمیان مذاکرات کے لیے عملی پیش رفت کب ہوتی ہے۔