محسن نقوی کا اعلان، اڈیالہ جیل کے قیدی اسلام آباد منتقل ہوں گے
شائع شدہ تاریخ 26 اکتوبر, 2026
9 نیوز ایچ ڈی: وفاقی وزیر داخلہ محسن نقوی نے وزیر مملکت برائے داخلہ طلال چوہدری کے ہمراہ بہارہ کہو کا دورہ کیا، جہاں انہوں نے مرکزی سڑک کے قریب سرکاری زمین واگزار کرانے کی ہدایت کی۔
محسن نقوی نے کہا کہ بہارہ کہو میں سرکار کی 108 کنال زمین خالی کرائی جائے گی۔ اس زمین پر تین میوزیم بنائے جائیں گے، جن میں آرمی میوزیم بھی شامل ہوگا۔
انہوں نے مزید کہا کہ اسلام آباد کے پرانے سیکٹرز جی 6، جی 7، جی 9 اور جی 10 کی تعمیر نو کی جائے گی تاکہ ان علاقوں کو بہتر بنایا جا سکے۔ ان کا کہنا تھا کہ شہر میں تجاوزات کے خلاف بلا تفریق کارروائی کی جائے گی۔
وفاقی وزیر داخلہ نے بتایا کہ اسلام آباد میں بجلی کی تاروں کا نظام بھی زیر زمین کیا جائے گا۔ اس منصوبے کے تحت لیسکو کے ساتھ مل کر بجلی کے کھمبے ختم کرنے پر کام کیا جائے گا، جس سے شہر کی سڑکوں اور علاقوں کی شکل بہتر بنانے میں مدد ملے گی۔
محسن نقوی نے کشمیر چوک انڈر پاس کے بارے میں بھی بات کی اور کہا کہ اسے جلد مکمل کرکے ٹریفک کے لیے کھول دیا جائے گا۔
ان اقدامات کا مقصد اسلام آباد میں سرکاری زمین کو قبضے سے خالی کرانا، پرانے علاقوں کو بہتر بنانا اور شہری سہولتوں میں اضافہ کرنا ہے۔
