ایران کا بڑا دعویٰ، طویل جنگ کیلئے اسلحے کی کمی نہیں
شائع شدہ تاریخ 09 اکتوبر, 2026
9 نیوز ایچ ڈی: ایران نے کہا ہے کہ اس کے پاس دشمن کے خلاف طویل جنگ جاری رکھنے کے لیے اسلحہ تیار کرنے کی وافر صلاحیت موجود ہے۔ ایرانی وزارتِ دفاع کے ترجمان رضا طلائی نیک کے مطابق ملک کی دفاعی صنعت اپنی ضروریات پوری کرنے کے لیے اسلحہ اور فوجی سازوسامان تیار کر رہی ہے۔
ایرانی ترجمان نے سرکاری ٹی وی کو انٹرویو دیتے ہوئے کہا کہ ملک میں اسلحہ بنانے کا عمل جاری ہے اور ضرورت پڑنے پر طویل عرصے تک جنگ کی ضروریات پوری کی جا سکتی ہیں۔ ان کے مطابق ایران نے اپنی اسلحہ سازی کی صلاحیت میں بھی اضافہ کیا ہے۔
طلائی نیک کا کہنا تھا کہ دفاعی شعبے سے وابستہ ادارے بدلتی ہوئی صورتحال اور جنگی تجربات کو مدنظر رکھتے ہوئے ہتھیاروں اور فوجی سازوسامان کو بہتر بنانے پر کام کر رہے ہیں۔ ایران کا مؤقف ہے کہ اس کی دفاعی پیداوار دشمن کے ممکنہ حملوں کا جواب دینے کی تیاری کا اہم حصہ ہے۔
یہ بیان ایسے وقت میں سامنے آیا ہے جب ایران اور امریکا کے درمیان کشیدگی برقرار ہے اور خطے میں صورتحال پر عالمی سطح پر نظر رکھی جا رہی ہے۔ تاہم، اسلحہ سازی کی صلاحیت سے متعلق یہ معلومات ایرانی حکام کا بیان ہیں، جن کی آزادانہ تصدیق الگ معاملہ ہے۔
